- माउन्टेन इनर्जी नेपालले गत आर्थिक वर्षमा खुद नाफा २९ प्रतिशतले बढाएर ७९ करोड ७० लाख रुपैयाँ पुर्याएको छ।
- विद्युत बिक्रीमा वृद्धि र प्रभावकारी व्यवस्थापनका कारण कम्पनीको प्रतिसेयर आम्दानी २५ रुपैयाँ ५२ पैसा पुगेको छ।
- प्राधिकरणसँगको विवादमा कम्पनीले २९ करोडभन्दा बढी रकम प्राप्त गरिसकेको र थप ९३ करोड उठाउन प्रक्रिया अघि बढाएको छ।
माउन्टेन इनर्जी नेपालले गत आर्थिक वर्ष २०८२/८३ मा लोभ लाग्दो वित्तीय प्रगति गरेको छ। कम्पनीले सार्वजनिक गरेको चौथोँ त्रैमासको अपरिस्कृत वित्तीय विवरणअनुसार, अघिल्लो वर्षको तुलनामा खुद नाफा २९.०८ प्रतिशतले वृद्धि गर्दै झन्डै ८० करोड रुपैयाँ पुर्याएको हो।
वित्तीय विवरणअनुसार, कम्पनीले गत आर्थिक वर्षमा ७९ करोड ७० लाख ३७ हजार रुपैयाँ खुद नाफा आर्जन गरेको छ। अघिल्लो आर्थिक वर्ष २०८१/८२ को सोही अवधिमा कम्पनीको खुद नाफा ६१ करोड ७४ लाख ७० हजार रुपैयाँ मात्र थियो। विद्युत बिक्रीमा भएको बढोत्तरी र प्रभावकारी व्यवस्थापनका कारण कम्पनीको नाफामा उल्लेख्य सुधार देखिएको हो।
नाफासँगै कम्पनीको प्रतिसेयर आम्दानी (इपिएस)मा पनि सुधार आएको छ। विवरणअनुसार कम्पनीको प्रतिसेयर आम्दानी २५ रुपैयाँ ५२ पैसा पुगेको छ। त्यस्तै, कम्पनीको प्रतिसेयर नेटवर्थ १ सय ५० रुपैयाँ ७८ पैसा कायम भएको छ भने मूल्य आम्दानी अनुपात २.२९ गुणा रहेको छ।
हाल कम्पनीको चुक्ता पुँजी ३ अर्ब १२ करोड ३२ लाख ५८ हजार रुपैयाँ रहेको छ। जगेडा कोषमा १ अर्ब ५८ करोड ५९ लाख रुपैयाँ सञ्चित छ। कम्पनीको कुल सम्पत्ति ७ अर्ब ८० करोड रुपैयाँ पुगेको छ।
कम्पनीको मुख्य आम्दानीको स्रोत रहेको विद्युत बिक्रीबाट हुने आम्दानीमा पनि वृद्धि भएको छ। समीक्षा अवधिमा कम्पनीले विद्युत बिक्रीबाट १ अर्ब ५३ करोड ३५ लाख ४३ हजार रुपैयाँ सञ्चालन आम्दानी गरेको छ। अघिल्लो वर्ष यस्तो आम्दानी १ अर्ब ३० करोड ७२ लाख ४६ हजार रुपैयाँ थियो।
कम्पनीअन्तर्गत सञ्चालित ५ मेगावाटको तादी खोला जलविद्युत आयोजनाले १५ करोड ३३ लाख ७० हजार रुपैयाँ र ४२ मेगावाटको मिस्त्री खोला जलविद्युत आयोजनाले १ अर्ब ३८ करोड १ लाख ७३ हजार रुपैयाँ बराबरको विद्युत बिक्री गरेका छन्।
माउन्टेन इनर्जीले नेपाल विद्युत प्राधिकरणसँगको कानूनी लडाइँमा पनि ठूलो सफलता प्राप्त गरेको छ। नेप्चाको फैसला र पाटन उच्च अदालतको आदेशपछि कम्पनीले प्राधिकरणबाट कुल २९ करोड ३० लाख ९० हजार रुपैयाँ प्राप्त गरिसकेको छ।
यसका साथै, अझै ९३ करोड २५ लाख ७० हजार रुपैयाँ (ब्याज बाहेक) प्राप्त गर्न बाँकी रहेको र सो कार्यान्वयनका लागि ललितपुर जिल्ला अदालतमा निवेदन दिइएको कम्पनीले जनाएको छ।
