- एमाले केन्द्रीय बैठकमा पार्टी सञ्चालन विधिको विषयलाई लिएर अध्यक्ष ओलीसँग कृष्णगोपाल श्रेष्ठको चर्काचर्की परेको छ।
- बैठक महासचिवले सञ्चालन गर्नुपर्ने माग राख्दै ओलीको कार्यशैलीप्रति आक्रोशित बनेका श्रेष्ठले बैठक बहिष्कार गरेर बाहिरिएका छन्।
- कुनै समय ओलीका कट्टर समर्थक रहेका श्रेष्ठले पटक-पटक अपमानित हुनुपरेको गुनासो गर्दै आफ्नो धैर्यको सीमा नाघेको बताएका छन्।
काठमाडौं । पाँच वर्षअघि एमाले अध्यक्ष केपी शर्मा ओलीको बचाउमा ‘केपी ओली फुटबलका पेलेजस्तै’ भन्दै खुलेर उभिएका कृष्णगोपाल श्रेष्ठ उनै ओलीसँग बैठक सञ्चालनको विधिलाई लिएर आमनेसामने भएका छन् ।
ललितपुरको भनिमण्डलमा जारी एमाले केन्द्रीय कमिटी बैठकमा अध्यक्ष ओलीले आफैं बैठक सञ्चालन गर्न थालेपछि श्रेष्ठले आपत्ति जनाएका हुन् । केन्द्रीय कमिटी बैठक महासचिवले सञ्चालन गर्ने प्रचलन रहेको भन्दै उनले ओलीलाई विधि–प्रक्रियाअनुसार अघि बढ्न आग्रह गरेका थिए ।
‘यो काम महासचिवको हो । तपाईंले सञ्चालन गर्न मिल्दैन । विधि–प्रक्रिया अनुसार जानुपर्छ,’ श्रेष्ठले भनेका थिए ।
ओलीले उनलाई बस्न आग्रह गर्दै ‘तपाईं अहिले बोल्न मिल्दैन’ भनेपछि श्रेष्ठ थप आक्रोशित भएका थिए । उनले ‘तपाईं मलाई रोक्ने को हो? पार्टी तपाईंको मात्रै हो?’ भन्दै प्रतिवाद गरेपछि बैठकस्थलमा चर्काचर्की भएको थियो ।
स्वयंसेवकहरूले श्रेष्ठलाई रोक्न खोजेपछि उनले उनीहरूसँग समेत प्रतिवाद गरेका थिए । त्यसपछि पत्रकारहरूलाई बैठकस्थलबाट बाहिर पठाइएको थियो । केहीबेरपछि श्रेष्ठ पनि बैठकबाट बाहिरिए र आफूले बैठक बहिष्कार गरेको बताए ।
सोमबार राति घटनाबारे प्रतिक्रिया दिँदै श्रेष्ठले आफू लामो समयदेखि ओलीप्रति निष्ठावान् रहे पनि पछिल्लो व्यवहारले धैर्यको सीमा नाघेको बताएका छन् ।
‘उहाँले नै श्रद्धाञ्जलि दिनुभयो, उहाँले नै कार्यक्रम सञ्चालन गर्नुभयो, उहाँले नै एजेन्डा ल्याउनुभयो । मेरो धैर्यको बाँध टुट्यो अनि मैले प्रतिवाद गरेँ,’ उनले भने ।
श्रेष्ठले ओलीबाट आफू अपमानित हुँदै आएको गुनासोसमेत गरे । ‘मैले ओलीका नाममा जीवन नै समर्पण गरेँ भन्दा हुन्छ । तर म उहाँबाट कति अपमान हुनुपर्यो, त्यो सबैले देखेका छन्,’ उनले भने ।
ओलीसँगको उनको राजनीतिक निकटता भने नयाँ होइन । २०७८ सालमा शिक्षामन्त्री रहेका बेला उनले सार्वजनिक कार्यक्रममै ‘केपी ओलीलाई हटाउने कोही माइकालाल छ?’ भन्दै ओलीको बचाउ गरेका थिए ।
तर एमालेको ११औं महाधिवेशनमा श्रेष्ठले ओली समूहबाट अलग हुँदै वरिष्ठ नेता ईश्वर पोखरेल समूहबाट सचिवमा उम्मेदवारी दिएका थिए । त्यसबेला उनले आफ्नो उम्मेदवारी व्यक्तिविरुद्ध नभई पार्टीभित्रको कार्यशैली र संस्कार परिवर्तनका लागि भएको बताएका थिए ।
सोमबारको घटनाले श्रेष्ठको राजनीतिक यात्रामा आएको यो परिवर्तनलाई फेरि सतहमा ल्याएको छ । कुनै समय ओलीको राजनीतिक बचाउमा अग्रपंक्तिमा रहेका श्रेष्ठ अहिले उनै ओलीलाई पार्टी सञ्चालनको विधि र प्रक्रियाको प्रश्न उठाउँदै प्रतिवाद गर्ने अवस्थामा पुगेका छन् ।
‘अति भएपछि प्रतिवाद गरेको हुँ,’ श्रेष्ठले भने, ‘यसको जबाफ भोलिका दिनमा हुन्छ ।’
