- वटा वाणिज्य बैंकले गत आर्थिक वर्षको लाभांश वितरण गर्न राष्ट्र बैंकमा पूर्वस्वीकृतिका लागि आवेदन दिएका छन्।
- बैंकहरूले दशैं अगावै साधारणसभा गरी लाभांश वितरण गर्ने योजना बनाएका छन्।
- राष्ट्र बैंकबाट छिटो स्वीकृति प्राप्त भएमा बैंकहरूले लाभांश घोषणा प्रक्रिया अगाडि बढाउनेछन्।
काठमाडौं । सेयरधनीहरूलाई गत आर्थिक वर्षको लाभांश वितरण गर्न ६ बैंकहरूले पूर्वस्वीकृतिका लागि राष्ट्र बैंकमा आवेदन दिएका छन् ।
आर्थिक वर्ष २०८२/८३ को वितीय विवरण सार्वजनिक गरेपश्चात् उनीहरूले लाभांश वितरण प्रक्रिया सुरू गरेका हुन् । बाह्य लेखापरीक्षणपछि लाभांशको पूर्वस्वीकृतिका लागि उनीहरू राष्ट्र बैंक गएका हुन् ।
हालसम्म एभरेष्ट, सानिमा, नबिल, कुमारी र माछापुच्छ्रे बैंकले लाभांश घोषणा अघि गत आबकाे वित्तीय विवरणकाे पूर्वस्वीकृति माग गर्दै राष्ट्र बैंक पुगेका हुन् । यस्तै नेपाल इन्फ्रास्ट्रक्चर बैंकले पनि लाभांश वितरणका लागि पूर्वस्वीकृति मागेको छ ।
बैंकहरूले लाभांश घोषणा अघि नेपाल राष्ट्र बैंकबाट अग्रिम स्वीकृत लिनुपर्छ । छिटो प्रिएप्रुभल पाएमा लाभांश घोषणा गरिहाल्ने र भदौ मसान्तसम्ममा अन्तिम स्वीकृति पाएमा दशैं अगाडि नै साधारणसभा गरी लाभांश वितरण गर्ने तयारीमा बैंकरहरू छन् । बैंकहरुले नगद लाभांशलाई प्राथमिकता दिने बैंकरहरु बताउँछन् । सञ्चालक समितिले प्रस्ताव गरेकाे लाभांश पारित गर्न साधारणसभा बोलाउनुपर्ने हुन्छ । लाभांश प्रस्तावका लागि पहिले राष्ट्र बैंकको प्रिएप्रुभल आउनुपर्ने भएकाले अहिले बैंकहरू यसको पर्खाईमा छन् ।
बैंकहरुले लाभांश प्रस्ताव गरेपछि साधारणसभा आह्वान गर्नुअघि राष्ट्र बैंकबाट अन्तिम स्वीकृति लिनुपर्छ । अन्तिम स्वीकृति पाएपछि साधारणसभाकाे मिति भन्दा २१ दिन अगाडि साधारणसभा आह्वानको सुचना प्रकाशित गर्नुपर्ने हुन्छ ।
भदौ मसान्तभित्रै अन्तिम स्वीकृति पाएमा उनीहरूले दशैं अगावै लाभांश वितरण गर्ने तयारी गर्नेछन् । तर प्रिएप्रुभलमै ढिलाई भएमा लाभांश वितरण प्रक्रिया लम्बिने बैंकरहरू बताउँछन् ।
राष्ट्र बैंकका अधिकारीहरूले सकेसम्म दशैंअघि नै लाभांश वितरण गर्नेगरी स्वीकृति प्रदान गर्न काम भइरहेकाे बताउँछन् । गत आबकाे अपरिस्कृत वित्तीय विवरण अनुसार लाभांश प्रस्तावका लागि राष्ट्र बैंकका पुगेका बैंकहरुमा नबिलकाे लाभांश क्षमता १९.१ प्रतिशत छ । एभरेष्ट बैंकको ३८.३२ प्रतिशत, सानिमा बैंकको २०.८५, माछापुच्छ्रे बैंकको ७.५१, कुमारी बैंकको ३.०२ प्रतिशत रहेको छ ।
यसअघि विकास बैंकहरूमा कामना सेवा विकास बैंक र सांग्रिला डेभलपमेन्ट बैंकले प्रिएप्रुभल पाएर लाभांश घोषणा गरिसकेका छन् । उनीहरू लाभांश वितरणका लागि साधारण सभाको पर्खाइमा छन् ।
