- आगामी बजेट सरकारको नीति तथा कार्यक्रमसँग पूर्ण रूपले मेल खाने गरी ल्याइनेछ।
- निजी क्षेत्रका नाममा हुने बेथिति रोक्दै गरिब तथा विपन्न वर्गको उत्थानमा सरकार केन्द्रित हुनेछ।
- सरकारका योजना जनताले अनुमोदन गरेको बाचापत्रमा आधारित रहेकाले यसमा नयाँपन खोज्नु निरर्थक छ।
अर्थमन्त्री डा. स्वर्णिम वाग्लेले सरकारको नीति तथा कार्यक्रम अनुसार नै आगामी वर्षको बजेट आउने बताएका छन् ।
प्रतिनिधिसभामा विनियोजन विधेयकका सिद्धान्त र प्राथमिकतामाथिको छलफलमा उठेका प्रश्नको जवाफ दिँदै मन्त्री वाग्लेले नीति तथा कार्यक्रम र विनियोजन विधेयकका सिद्धान्त तथा प्राथमिकताबीच पूर्ण रूपमा तालमेल रहेको भन्दै आगामी बजेट पनि त्यही दिशामा हुने बताए ।
उनले निजी उद्यमीको आवरणमा बदमासी गर्नेहरूको बचाउ नगर्दिन विपक्षी सांसदहरूलाई आग्रह गरे । श्रमिक, किसान, भूमिहीन, सुकुम्वासी र अवसरबाट वञ्चित समुदायको आर्थिक हैसियत माथि उठाउने गरी सरकार प्रस्तुत हुने उनले बताए ।
गरिबीको खेती नै गर्ने एउटा ठूलो उद्योग रहेको भन्दै उनले त्यसले निरन्तरता नपाउने स्पष्ट पारे ।
मन्त्री वाग्लेले पुरानै शब्दजालको खोजी गर्नेहरूले सरकारको कार्यक्रममा नयाँ कुरा नभेटेको तर्क गरे । विद्रोहपछि धेरै कुरामा बदलाव भएको र बाचा पत्रमा प्रस्तुत गरेका सय बुँदालाई जनताले अनुमोदन गरेको भन्दै उनले त्यसलाई विशेष ध्यान दिने उल्लेख गरे ।
उनले सरकारको कार्यक्रमलाई आफ्नै दस्ताबेज बनाउन अर्को चुनाव कुर्न सुझाव दिए ।
