नेपाल राष्ट्र बैंकले बैंकिङ प्रणालीमा अधिक तरलता भए पछि ४० अर्ब तरलता खिच्ने भएको छ । स्थायी निक्षेप सुविधा (एसडीएफ) मार्फत् नियमित रूपमा तरलता खिचिरहेको राष्ट्र बैंकले बुधबार निक्षेप संकलन उपकरण मार्फत थप ४० अर्ब तरलता खिच्ने भएको हो ।
अघिल्लो दिन मंगलबार मात्रै स्थायी निक्षेप सुविधा (एसडीएफ) अन्तर्गत प्रणालीबाट १ खर्ब ७४ अर्ब ५५ करोड रुपैयाँ उठाएको राष्ट्र बैंकले बुधबार २१ दिन अवधिका लागि निक्षेप संकलन उपकरणमार्फत ४० अर्ब रुपैयाँ बोलकबोल गर्ने भएको हो । मध्यान्ह ३ बजेसम्म अनलाइनमार्फत बोलकबोलमा सहभागी हुन सकिनेछ। जसको सावाँ र ब्याज भुक्तानी असोज २ गते हुनेछ । ब्याजदर बोलकबोलबाट निर्धारण हुनेछ ।
बैंकहरूले घटीमा १० करोड र बढीमा ५ करोडले भाग जानेगरी बोलकबोल हुने रकमसम्मको आवेदन दिन सक्नेछन् । उक्त उपकरण राष्ट्र बैंक बाहेक अन्य बैंक तथा वित्तीय संस्थासँग धितो राख्न सकिने केन्द्रीय बैंकले जनाएको छ ।
वित्तीय बजारमा अधिक तरलताको स्थितिमा सोको व्यवस्थापन गरी बजार ब्याजदरलाई व्यवस्थित गर्न आवश्यकता अनुसार राष्ट्र बैंकले आफ्ना काउन्टरपार्टीहरूबाट संकलन गरिने निक्षेप उपकरण नै निक्षेप संकलन उपकरण हो । यसअघि भदौ ११ गते मंगबार मात्रै राष्ट्र बैंकले स्थायी निक्षेप सुविधा अन्तर्गत प्रणालीबाट १ खर्ब ७४ अर्ब ५५ करोड रुपैयाँ उठाएको छ।
यसमा बैंकहरूले ३ प्रतिशत ब्याजदर पाउँछन्। स्थायी निक्षेप सुविधाअन्तर्गत चालु आर्थिक वर्ष सुरु भए यता मात्रै राष्ट्र बैंकले १८ पटक गरेर ५१ खर्ब ६ अर्ब ५५ करोड रूपैयाँ उठाएको छ। यसमध्ये १ खर्ब ७४ अर्ब रूपैयाँ मात्रै बैंकहरूमा फिर्ता हुन बाँकी रकम हो।
