परराष्ट्र सचिव बनेको आठ महिना मै सेवा लम्सालले परराष्ट्र मन्त्रालयका उपल्लो पदबाट हात धुनु परेको छ ।
२०८० मंसिर २९ मा सचिव भएकी लम्साल अझै एक वर्ष २०८२ असारसम्म सचिव रहेर काम गर्ने अवसर रहँदारहँदै उनलाई बेल्जियमको राजदूत बनाएर पठाउन सरकारले निर्णय गरिसकेको छ । जसको कारण सेवाले परराष्ट्र सचिवको कार्यभार सम्हाल्न नसक्नुलाई लिइएको परराष्ट्र मन्त्रालयमा दैनिक चर्चा चल्ने गरेको छ ।
‘सचिव लम्सालबाट सामान्य काम पनि लिन नसकेपछि परराष्ट्र मन्त्री डा आरजु राणा असन्तुष्ट हुनुहुन्थ्यो र काममा दखल भएका र इमान्दार छवी भनेर चिनिने सहसचिव अमृत राईबाटमात्र मन्त्रालयका काम सम्पादन गर्न सकिने निचोडका साथ उहाँलाई राजदूतमा सिफारिस गरिएको हो ।’– परराष्ट्र मन्त्रालयका एक उच्च अधिकृतले भने ।
लम्सालले आठ महिनाको अवधिमा नेपाली कांग्रेसका नेता एनपी साउद, माओवादी केन्द्रका उपाध्यक्ष नारायणकाजी श्रेष्ठ परराष्ट्रमन्त्री बन्दा सचिव पदमै रहेर कार्य सम्पादन गरिसकेकी थिइन् । पछिल्लो गठबन्धनमा डा राणा परराष्ट्रमन्त्री बनेपछि महिला मन्त्री र महिला नै सचिव हुँदा कार्यसम्पादनमा सहज हुने आङ्कलन सबत्र गरिएको थियो । तर, त्यो आङ्कलनले लामो समय टिक्न सकेन र सरकारले लम्साललाई पाखा पार्दे सहसचिव अमृत राईलाई परराष्ट्र सचिव बनाउने ढोका खोलेको हो ।
मन्त्रालयका वरिष्ठतम् सहसचिव राईको कामलाई हालका दिनसम्म सबैले प्रशंसा गर्दै आएका छन् ।
सामान्य व्यक्ति, विवादरहीत र कार्यसम्पादनमा सधैं अब्बल रहेका उनलाई सरकारले कायमुकायम सचिवको जिम्मा दिइसकेको छ । लम्साललाई सचिवबाट नहटाएको भए ०८२ असारपछि राई नै वरिष्ठतम्का आधारमा सचिव हुने नै थिए । अब भने उनको सचिव पदको समय बढी हुने छ । निजामति सेवामा सचिवको कार्यकाल ५ वर्षको रहने व्यवस्था छ ।
‘सहसचिव राई विना मन्त्रालयका काम नै सम्पादन गर्न सहज नभएपछि लम्साललाई राजदूतमा सिफारिस गर्नु परेको हो । यसमा सचिव लम्साल भने सहमत थिइनन् । उनी राजदूत त हुने तर सचिवको कार्यकाल सकिएपछि भन्ने मान्यतामा रहेकै बेला सरकारले उनलाई राजदूतमा पठाउने निर्णय गरेको हो ।’– परराष्ट्रका एक अधिकारीले भने ।
