वाणिज्य बैंकहरूले मुद्दती निक्षेपमा प्रदान गर्ने औसत ब्याजदर यही चैत महिनाका लागि घटेको छ । प्राप्त तथ्यांक अनुसार फागुन महिनाको तुलनामा चैतमा बैंकहरूको मुद्दतीतर्फको औसत ब्याजदरमा केही कमी आएको देखिएको हो ।
वाणिज्य बैंकहरूको व्यक्तिगत निक्षेपतर्फको औसत ब्याजदर फागुनमा ४.५७ प्रतिशत रहेकोमा चैतमा ४.४९ प्रतिशत कायम भएको छ, जुन ०.०८ प्रतिशतको गिरावट हो । त्यसैगरी, संस्थागत निक्षेपतर्फको औसत ब्याजदर पनि फागुनको ३.३३ प्रतिशतबाट घटेर चैतमा ३.२९ प्रतिशत पुगेको छ ।
तथ्यांक अनुसार नेपाल बैंकले व्यक्तिगततर्फ सबैभन्दा धेरै ०.६ प्रतिशतले ब्याजदर घटाएको छ । त्यस्तै, ग्लोबल आइएमई बैंकले व्यक्तिगततर्फ ०.२५ प्रतिशत र संस्थागततर्फ ०.५० प्रतिशतले ब्याजदर घटाएको छ । व्यक्तितर्फको मुद्दतीमा कृषि विकासले ०.१४, कुमारीले ०.३१, प्राइमले ०.१० र स्ट्याण्डर्ड चार्टर्डले ०.१४ कटौती गरेका छन् । नेपाल एसबिआई बैंकले भने संस्थागततर्फ मात्र ०.०२ प्रतिशतले ब्याजदर घटाएको देखिन्छ ।
धेरैजसो बैंकहरूले भने चैत महिनाका लागि आफ्नो ब्याजदर स्थिर राखेका छन् । एनएमबि, राष्ट्रिय वाणिज्य, र एनआइसी एशियाले व्यक्तिगततर्फ ५ प्रतिशत र संस्थागततर्फ ४ प्रतिशतको ब्याजदरलाई निरन्तरता दिएका छन् ।
