सरकारको विशेष प्राथमिकतामा रहेका राष्ट्रिय गौरवका आयोजनाको बजेट खर्च र भौतिक प्रगति अत्यन्तै कमजोर देखिएको छ ।
अर्थ मन्त्रालयले सार्वजनिक गरेको चालू आर्थिक वर्षको बजेटको अर्धवार्षिक मूल्यांकन प्रतिवेदनअनुसार विनियोजित बजेटको जम्मा १५.४९ प्रतिशतमात्रै ६ महिनामा खर्च भएको छ ।
२७ वटा राष्ट्रिय गौरवका आयोजनामध्ये चालू बजेटमा राष्ट्रिय गौरवका २३ वटा कार्यान्वयनमा छन् । पुस मसान्तसम्म यी आयोजनामा ६७ अर्ब ८६ करोड विनियोजन भएकोमा जम्मा १० अर्ब ३९ करोड (१५.४९ प्रतिशत) मात्र खर्च भएको छ । मेलम्ची खानेपानी आयोजना ९९.५२ प्रतिशत र पुष्पलाल राजमार्ग ८१.७३ प्रतिशत भौतिक प्रगतिसहित अगाडि देखिएका छन् भने निजगढ विमानस्थलको प्रगति शून्य छ ।
कुन आयोजनाको प्रगति कस्तो ?
केही पुराना र ठूला सडक आयोजनाको भौतिक प्रगति उत्साहजनक देखिए पनि नयाँ र जटिल आयोजना सुस्त रहेको प्रतिवेदनमा उल्लेख छ ।
पुष्पलाल (मध्य पहाडी) राजमार्ग: कुल भौतिक प्रगति ८१.७३ प्रतिशत पुगेको छ । १५२९ किलोमिटर सडक कालोपत्रे सकिएको ।
हुलाकी राजमार्ग: ७४.३५ प्रतिशत भौतिक प्रगतिसहित १३८० किलोमिटर सडक कालोपत्रे सम्पन्न भएको छ ।
काठमाडौं-तराई द्रुतमार्ग (फास्ट ट्र्याक): भौतिक प्रगति ४२.१३ प्रतिशतमात्रै । ६ महिनामा २ अर्ब ४२ करोड खर्च ।
मेलम्ची खानेपानी : पहिलो चरणको भौतिक प्रगति ९९.५२ प्रतिशत पुगेको छ । बाढी र प्राकृतिक विपत्तिले मुहान क्षेत्रमा अझै समस्या ।
विमानस्थलहरू: गौतम बुद्ध र पोखरा अन्तर्राष्ट्रिय विमानस्थल निर्माण सम्पन्न । निजगढ अन्तर्राष्ट्रिय विमानस्थलको भौतिक प्रगति शून्य ।
रेल, मेट्रो रेल तथा मोनोरेल विकास आयोजनाको प्रगति जम्मा ८.१८ प्रतिशत ।
राष्ट्रिय गौरवका आयोजना विलम्ब हुनुमा जग्गा प्राप्ति र मुआब्जा, रुख कटान र वन क्षेत्रको भोगाधिकारसम्बन्धी कानुनी जटिलता, डिपीआर टुंगो नलाग्दै योजनाको सुरूवात, आन्दोलनको प्रभाव जस्ता समस्या देखाइएको छ ।
