- भोटेकोशी बाढीको क्षतिप्रति लस एन्ड ड्यामेज कोषले समवेदना प्रकट गर्दै नेपाल सरकारको सहयोग आग्रहलाई गम्भीरतापूर्वक लिएको जनाएको छ।
- कोषले नेपालको अनुरोधलाई छिटो सम्बोधन गर्न आवश्यक प्रक्रिया र नीतिगत विकल्पहरूमा छलफल अगाडि बढाएको छ।
- नेपालले उपलब्ध गराएको क्षतिसम्बन्धी तथ्याङ्कको प्रशंसा गर्दै कोषले राहत र पुनर्स्थापनाका लागि छिट्टै ठोस सहयोग पुग्ने विश्वास दिलाएको छ।
नेपालमा गएको विनाशकारी भोटेकोशी बाढीका कारण भएको क्षति भएको विषयमा ‘लस एन्ड ड्यामेज कोष (एफआरएलडी) ले’ जवाफ फर्काएको छ । कोषका बोर्ड सह–अध्यक्षहरूले नेपाल सरकारलाई एक पत्र पठाउँदै नेपाली जनता र सरकारप्रति गहिरो समवेदना तथा ऐक्यबद्धता प्रकट गरेका हुन् ।
भदौ १५ गते नेपाल सरकारतर्फबाट कोषलाई आपतकालीन सहायताको आग्रहको गरेको थियो । उक्त पत्रको आज जवाफ दिँदै कोषले भनेको छ– ‘कोषले यस विषयमा गम्भीरतापूर्वक काम गरिरहेका छौँ ।’ जवाफ अर्थमन्त्री डा.स्वर्णिम वाग्ले र कृषि, वन तथा वातावरण मन्त्री गीता चौधरीलाई सम्बोधन गरी पठाएको छ । ‘बोर्डसँग छलफल गरी जतिसक्दो चाँडो नेपालको आपतकालीन अनुरोधलाई सम्बोधन गर्न प्रक्रिया अगाडि बढाएका छौँ,’ कोषले भनेको छ ।
कोषले नेपालको यस सङ्कटको घडीमा प्रतिक्रियालाई छिटो र प्रभावकारी बनाउन आफ्ना म्यानेडट, फ्रेमवर्क, संरचना, नीति र कार्यविधिभित्र रहेर विकल्पहरू विचार गर्न बोर्डलाई सिफारिस गरेको छ । यसले राहत तथा पुनर्स्थापनाको काममा ढिलाइ नभई यथाशक्य छिट सहयोग पुग्ने अपेक्षा गरिएको पत्रका उल्लेख छ ।
‘विनाशकारी घटनाको यस सङ्कटपूर्ण समयमा पनि नेपाल सरकारले प्रारम्भिक मूल्याङ्कन, आधिकारिक डेटा, उपग्रह (स्याटेलाइट) बाट प्राप्त सूचना र क्षति विवरण उपलब्ध गराउन देखाएको तत्परताप्रति कोषले उच्च प्रशंसा गरेको छ,’ पत्रमा भनिएको छ । कोषले सरकार आफ्ना राहत कार्यहरूमा केन्द्रित भइरहेको बेला आवश्यक पर्ने थप विवरणहरूका लागि कोषको सचिवालय निरन्तर सम्पर्कमा रहने विश्वास दिलाइएको छ ।
एफआरएलडी बोर्डका सह–अध्यक्षद्वय मियामी मिनर्भा रोड्रिगेज टाभारेज र जर्ज बोर्सटिङले पठाएको जवाफी पत्रमा नेपालको जलवायुजन्य विपद्को क्षतिपूर्ति तथा आपतकालीन उद्धारका लागि अन्तर्राष्ट्रिय स्तरबाट छिट्टै ठोस सहयोग जुट्ने अपेक्षा गरिएको उल्लेख छ ।
