- नेपालमा निर्मित यात्री पी-२ विद्युतीय स्कुटरले स्वदेशी उत्पादनप्रति राष्ट्रिय आत्मविश्वास जगाएको छ।
- बुढानीलकण्ठमा डिजाइन र धादिङमा उत्पादन भएको यो स्कुटरले नेपालमा विश्वस्तरीय वस्तु बन्न सक्छ भन्ने सन्देश दिएको छ।
- सरकारले यस स्कुटरको गुणस्तर विकास र अन्तर्राष्ट्रिय बजार विस्तारका लागि आवश्यक सहयोग गर्ने प्रतिबद्धता जनाएको छ।
काठमाडौँ । अर्थमन्त्री डा. स्वर्णिम वाग्लेले नेपालमै डिजाइन र उत्पादन गरिएको विद्युतीय स्कुटर ‘यात्री पी-२’ले स्वदेशी उत्पादनप्रति राष्ट्रिय आत्मविश्वास जगाएको बताएका छन्।
सिप्रदी यात्री कम्पनीले निर्माण गरेको स्कुटर सोमबार सार्वजनिक गर्दै अर्थमन्त्री वाग्लेले नेपालमै विश्वस्तरीय उत्पादन सम्भव रहेको सन्देश यात्रीले दिएको बताए।
उनले स्कुटरको डिजाइन बुढानीलकण्ठमा गरिएको र धादिङमा उत्पादन हुने उल्लेख गर्दै स्वदेशमै डिजाइनदेखि उत्पादनसम्मको काम हुनु सकारात्मक भएको बताए।
‘बुढानीलकण्ठमा डिजाइन गरिएको र धादिङमा उत्पादन हुने विश्वस्तरीय स्कुटर नेपालमै बन्यो। नेपालमा केही हुँदैन भन्नेहरूका लागि यो “नेपालमा बबालै हुन्छ” भन्ने सन्देश हो,’ अर्थमन्त्री वाग्लेले भने, ‘नेपालमै बनेको यात्री विद्युतीय स्कुटरले राष्ट्रिय आत्मविश्वास पनि जगायो।’
अर्थमन्त्री वाग्लेले यात्री पी-२ ले अन्तर्राष्ट्रिय बजारमा समेत प्रतिस्पर्धा गर्न सक्ने गरी आफ्नो गुणस्तर स्थापित गरोस् भन्ने अपेक्षा व्यक्त गरे। उनले इटालीका प्रख्यात ब्रान्डभन्दा पनि अब्बल बन्ने र विश्व बजारमा विस्तार हुन सक्ने उत्पादनका रूपमा विकास होस् भन्दै शुभकामना दिए।
स्वदेशमै निर्माण भएको विद्युतीय स्कुटरको उत्पादन तथा बजार विस्तारका लागि सरकारले आवश्यक सहयोग र संरक्षण गर्ने प्रतिबद्धतासमेत अर्थमन्त्री वाग्लेले व्यक्त गरे।
