नेपालको कुल ग्राहस्थ उत्पादन (जिडिपी) मा सहकारी क्षेत्रले पुर्याएको वास्तविक योगदानको पहिचान गर्न ‘सहकारी संस्था सर्वेक्षण’ सञ्चालन गरिने भएको छ । राष्ट्रिय तथ्यांक कार्यालय र सहकारी विभागको संयुक्त सहकार्यमा यो सर्वेक्षण हुन लागेको हो ।
सहकारी विभागले एक सूचना जारी गर्दै सर्वेक्षणका लागि तथ्यांक संकलन कार्य यही २०८२ चैत १९ गतेदेखि सुरु भई २०८३ असारसम्म चल्ने जानकारी दिएको छ । यस अवधिमा विभागले खटाएका गणकहरूले छनौटमा परेका विभिन्न सहकारी संघ/संस्थाहरूको स्थलगत भ्रमण गरी तथ्यांक संकलन गर्नेछन् ।
सहकारी विभागकी उप–रजिष्ट्रार सुचित्रा राईले सहकारी संस्थाहरूलाई सर्वेक्षणमा पूर्ण सहयोग गर्न अनुरोध गरेकी छिन् । तथ्यांक संकलनका लागि आउने गणकहरूलाई आफ्नो संस्थाको सही विवरण उपलब्ध गराएर समन्वय गरिदिन उनको आग्रह छ ।
