नेपाल विद्युत प्राधिकरणका कार्यकारी निर्देशक कुलमान घिसिङले प्राकृतिक र प्राविधिक कारण यदाकदा बिजुली आउने/जाने गरे पनि लोडसेडिङ अब इतिहास भइसकेको बताएका छन् । प्राधिकरणको ३९ औं वार्षिकोत्सवको अवसरमा कार्यकारी निर्देशक घिसिङले यस्तो बताएका हुन् ।
घिसिङले ०७३ मा तिहारको लक्ष्मीपुजाको दिनदेखि काठमाडौं उपत्यकाबाट अन्त्य गरेको लोडसेडिङ ०७५ वैशाखदेखि देशभर अन्त्य गर्न सफल भएको बताए । कुनैबेला देशमा दैनिक १८ घण्टा लोडसेडिङबाट व्यहोर्नुपरेको अवस्थामा अहिले भारतमा बिजुली निर्यात गर्ने अवस्थामा पुगेको बताए ।
वर्षायाममा ७ सय मेगावाटभन्दा बढी बिजुली निर्यात गर्ने अवस्थामा पुगेको उनले जनाए ।वर्षायाममा भारत निर्यात गरी व्यापार घाटा कम गरी विदेशी मुद्रा आर्जन गर्न सहयोग पुगको उनको भनाइ थियो । हिउँदमा अझै केही महिना आयात गर्नु परेता पनि आयातको परिमाण घट्दै जाने उनले जनाए ।
