- विश्व वातावरण दिवसमा वर्ल्ड भिजनले एक बालबालिका एक बिरुवा अभियान सञ्चालन गर्दैछ।
- यस अभियानमा देशभरका ८० हजार बालबालिकाले फलफूल लगायतका बिरुवा रोप्नेछन्।
- बालबालिकालाई वातावरणप्रति जिम्मेवार बनाउन रोपेका बिरुवाको नियमित अनुगमन गरिनेछ।
विश्व वातावरण दिवसको अवसरमा वर्ल्ड भिजन इन्टरनेसनल नेपालले देशभर ‘एक बालबालिका, एक बिरुवा’ अभियान सञ्चालन गर्ने भएको छ । अभियानअन्तर्गत करीब ८० हजार बालबालिकाले आफ्नो घर तथा समुदायमा वृक्षरोपण गर्ने बताइएको छ ।
नेपाल सरकारले यस वर्षको विश्व वातावरण दिवसका लागि ‘समृद्ध भविष्यको आधारः जलवायु एवम् प्रकृतिमैत्री विकास’ भन्ने मूल नारा तय गरेको छ । सोही अभियानलाई सहयोग पुग्ने गरी वर्ल्ड भिजनले जेठ २२ गते देशव्यापी वृक्षारोपण कार्यक्रम आयोजना गर्न लागेको हो ।
अभियानमार्फत बालबालिकालाई जलवायु परिवर्तन र बढ्दो तापक्रमका चुनौतीबारे सचेत बनाउँदै वातावरण संरक्षणमा सक्रिय सहभागी बनाइने जनाइएको छ । बालबालिकाले परिवार, शिक्षक, स्थानीय सरकार तथा सामुदायिक वन उपभोक्ता समूहसँगको सहकार्यमा हिमाल, पहाड र तराईका विभिन्न क्षेत्रमा बिरुवा रोप्नेछन् ।
स्थानीय वातावरणअनुकूल बिरुवा छनोट गर्न स्थानीय सरकार र जिल्ला वन कार्यालयसँग समन्वय गरिएको वर्ल्ड भिजनले जनाएको छ । बालबालिकामा देखिएको कुपोषण समस्यालाई ध्यानमा राख्दै फलफूलका बिरुवालाई प्राथमिकता दिइनेछ ।
वर्ल्ड भिजन इन्टरनेसनल नेपालका प्राविधिक कार्यक्रम (उत्थानशीलता तथा जीविकोपार्जन) सह–निर्देशक प्रकाश तिवारीले बालबालिकालाई सानैदेखि प्रकृतिप्रति जिम्मेवार र वातावरणीय संरक्षणमा सक्रिय बनाउन अभियान केन्द्रित रहेको बताए । उनका अनुसार प्रत्येक बालबालिकाले रोपेको बिरुवाले हरित तथा जलवायु–उत्थानशील नेपाल निर्माणमा योगदान पुर्याउनेछ ।
वृक्षरोपणसँगै बालबालिकालाई ‘मेरो बिरुवा कार्ड’ वितरण गरिनेछ । कार्डमा बिरुवाका फाइदाबारे जानकारी समेटिनेछ भने बिरुवाको संरक्षण र हेरचाहप्रति जिम्मेवारीबोध गराउने उद्देश्य राखिएको छ । रोपिएका बिरुवाको संरक्षण सुनिश्चित गर्न वर्ल्ड भिजनका फिल्ड टोली र शिक्षकहरूले तीन र ६ महीनापछि अनुगमन गर्नेछन् ।
अभियानअन्तर्गत देशका तीनै भौगोलिक क्षेत्रमा कम्तीमा ८० हजार बिरुवा रोप्ने, १०० भन्दा बढी विद्यालय तथा सामुदायिक समूहलाई सहभागी गराउने, बालबालिकाको नेतृत्वमा वातावरणीय संरक्षण प्रवर्द्धन गर्ने तथा बालबालिका, समुदाय र सरकारबीचको साझेदारी सुदृढ गर्ने लक्ष्य राखिएको छ ।
वर्ल्ड भिजनले जलवायु परिवर्तनको बढ्दो जोखिमका बीच बालबालिकाको भविष्य सुरक्षित गर्न तथा प्राकृतिक स्रोतको पुनर्स्थापनामा समुदायसँग सहकार्य गर्दै निरन्तर काम गर्ने प्रतिबद्धता जनाएको छ ।
